Память: 9 сентября(27 августа ст. ст.)
Не утвержден для общецерковного использования.
Конда́к 1
Избра́нному от оби́тели Пече́рския, страны́ вя́тичей просвети́телю, по́хвальное прино́сим пе́ние. Ты же, я́ко ве́лий учи́телю наш и засту́пниче, моли́ Христа́ Бо́га да изба́вит страну́ на́шу от бед и напа́стей, и утверди́т ны в Правосла́вии и ве́ре, да любо́вию вопие́м ти:
Ра́дуйся, священному́чениче Ку́кше, просвети́телю страны́ на́шея.
И́кос 1
А́нгелов Творе́ц посла́ тя из оби́тели Пече́рския в страну́ на́шу, да просвет́иши лю́дие седя́щия во тьме и се́ни сме́ртней, и наста́виши заблу́дшия во тьме язы́чества. Ты же прише́л еси́ к нам, вели́кий уго́дниче, ве́рою Христо́вою, я́ко ка́мением многоце́нным, украша́я страну́ на́шу. Те́мже просвеще́ни ве́рою и в ней утвержде́ни, любо́вию вопие́м ти си́це:
Ра́дуйся, свети́ло пресве́тлое, луча́ми свои́ми осиява́ющее вели́кую Росси́ю;
Ра́дуйся, честны́й во́ине Христа́ Бо́га, мрак неве́рия усе́рдно прогоня́ющий;
Ра́дуйся, чудотво́рче преди́вный, твои́ми чудесы́ всех удиви́вый;
Ра́дуйся, столпе́ Це́ркве Христо́вой, на подкрепле́ние нам от Бо́га угото́ванный;
Ра́дуйся, я́ко тобо́ю научи́хомся поклоня́тися Творцу́ в Тро́ице;
Ра́дуйся, священному́чениче Ку́кше, просвети́телю страны́ на́шея.
Конда́к 2
Ви́дев Госпо́дь страну́ на́шу во тьме су́щую и язы́ческою мгло́ю погубля́емую, посла́ тя, преподо́бне, из оби́тели Пече́рския, да бу́деши лю́дем наста́вник, учи́тель и па́стырь, и всех приведе́ши к Бо́гу, зову́щих: Аллилу́иа.
И́кос 2
Ра́зум богопросвеще́нный твой ви́дяще жи́тели страны́ на́шея, вя́тичи имену́емыя, схожда́хуся к тебе́ и поуча́хуся словесе́м твои́м и по́двигом, креще́ние от тебе́ прие́мляху. Мы же от о́ных восприе́мше В́еру правосла́вную, восхваля́ем тя вопию́ще:
Ра́дуйся, наста́вниче преди́вный, возведы́й нас к позна́нию Христа́ Бо́га;
Ра́дуйся, вели́кий учи́телю, научи́вый лю́ди страны́ на́шея правосла́вной ве́ре;
Ра́дуйся, пресве́тлый свети́льниче, тьму неве́дения и злоче́стия разсе́явый;
Ра́дуйся, па́стырю до́брый, приводя́й слове́сное ста́до к небе́сным па́житем;
Ра́дуйся тве́рдый ко́рмчий корабля́ Иису́сова, от волн греха́ и страсте́й спаса́яй нас;
Ра́дуйся, священному́чениче Ку́кше, просвети́телю страны́ на́шея.
Конда́к 3
Си́ла Бо́жия осени́ тя, о́тче Ку́кше, мно́гими чудесы́ в стране́ на́шей прасла́вив тя: бе́сы прогна́л еси́, дождь с небесе́ свел еси, е́зеро изсуши́л еси́ и ины́я разли́чныя ди́вныя чудеса́ сотвори́л еси́. Те́мже лю́дие, ви́девшие вся си́я, воспе́ша просла́вльшему тя Бо́гу: Аллилу́иа.
И́кос 3
Имея вои́стину, преподо́бне Ку́кше, вели́кий дар чудотворе́ний от Христа́ Бо́га к ве́чному спасе́нию лю́ди приве́л еси́, ве́лия чудеса́ и зна́мения творя́, да вси у́зрят си́лу Бо́жию, в не́мощи соверша́емую, и оста́вльше тьму язы́ческаго нече́стия навы́кнут сла́вити тя си́це:
Ра́дуйся, чудотво́рче изря́дный, даро́ванный нам от Бо́га;
Ра́дуйся, попечи́телю о спасе́нии душ челове́ческих, чудеса́ми нас удивля́яй;
Ра́дуйся, корми́телю си́рых, дождь с небесе́ чуде́сно низве́дый;
Ра́дуйся, спаси́телю ди́вный, моли́твами твои́ми бе́сы прогна́вый;
Ра́дуйся, помо́щниче тружда́ющихся, си́лою Бо́жиею е́зеро изсуши́вый;
Ра́дуйся, священному́чениче Ку́кше, просвети́телю страны́ на́шея.
Конда́к 4
Бу́рею зло́бы и неи́стовства ды́шуще нечести́вии служи́телие безду́шных и́долов, воздвиго́ша гоне́ния на тя, преподо́бне о́тче, мня́ще де́ло твое́ уничто́жити и ве́ру Христо́ву истреби́ти. Ты же и в страда́нии твое́м воспе́л еси дерзнове́нно Бо́гу: Аллилу́иа.
И́кос 4
Слыша́вше дерзнове́нную про́поведь Ева́нгелия и ви́девше богоуго́дное житие́ твое́, неве́рнии лю́дие мече́м усекну́ша тя с блаже́нным ти уче́ником. Мы же, почита́я твоя́ за Христа́ страда́ния, про́сим твоея́ по́мощи и заступле́ния: утверди́ нас в ве́ре, уго́дниче Христо́в, за Возлюби́вшаго всех кровь свою́ пролия́вый:
Ра́дуйся, испове́дниче правосла́вныя ве́ры, неве́рныя облича́яй;
Ра́дуйся, па́стырю до́брый, ду́шу свою́ положи́вый за слове́сное ста́до;
Ра́дуйся, на́ше прибе́жище в годи́ну ско́рби и печа́ли твои́ми страда́нии нас укрепля́яй;
Ра́дуйся, честна́я главо́, главу́ свою́ за ве́ру положи́вый;
Ра́дуйся, священному́чениче Ку́кше, просвети́телю страны́ на́шея.
Конда́к 5
Боготе́чная звезда́ яви́лся еси́, преподо́бне Ку́кше, приводя́ к Го́рнему Иерусали́му всех тя послу́шающих. Твои́ми бо уче́ньми наставля́еми навыко́хом воспева́ти еди́ному и́стинному Бо́гу: Аллилу́иа.
И́кос 5
Ви́девше по́двиги твоя́ в науче́нии люде́й и́стине Христо́вой, мно́зи после́доваху стопа́м твои́м и та́ко ски́нии благода́ти умножа́хуся в стране́ на́шей, правове́рныя лю́дие та́мо воспева́ют тя се́рдцы и усты́:
Ра́дуйся, хра́ме Ду́ха Свята́го, всех ве́рных озаря́яй благода́тию;
Ра́дуйся, страны́ на́шея украше́ние, ду́ши ве́рных веселя́щее;
Ра́дуйся, звездо́ пресве́тлая, указу́ющая всем путь к Небе́сным оби́телем;
Ра́дуйся, апо́столов досто́йный прее́мниче, свои́ми труды́ обрати́вый ко Христу́ лю́ди заблу́дшия;
Ра́дуйся, му́чеников честны́й подража́телю, свое́ю кровию запечатле́вый про́поведь Ева́нгелия Христо́ва;
Ра́дуйся, священному́чениче Ку́кше, просвети́телю страны́ на́шея.
Конда́к 6
Пропове́дник любве́ Христо́вы был еси́, блаже́нне Ку́кше, всем житие́м твои́м явля́я нам о́браз чистоты́, смире́ния и кро́тости. Научи́ и нас сим доброде́телем, преподо́бне, да с тобо́ю воспева́ем возлюби́вшему тя Бо́гу: Аллилу́иа.
И́кос 6
Возсия́ стране́ на́шей свет богоуго́днаго жития́ твоего́, преподо́бне о́тче, сего́ ра́ди подае́ши моли́твами твои́ми чту́щим тя ми́лости неизрече́нныя: боля́щим – исцеле́ние, скорбя́щим – утеше́ние, пла́чущим – ра́дование, да вси лю́дие прославля́ют тя, ди́внаго во святы́х Бо́жиих:
Ра́дуйся, путеводи́телю преди́вный, приводя́й к све́ту неве́рныя;
Ра́дуйся, тишину́ Христо́ву па́че всего́ ми́ра возлюби́вый;
Ра́дуйся, уте́шителю печа́льных, в скорбе́х и беда́х и напа́стех всем нам помога́яй;
Ра́дуйся, врачу́ ско́рый и безме́здный, ту́не исцеля́й боле́зни душе́вныя и теле́сныя;
Ра́дуйся, показа́вый нам о́браз любве́, милосе́рдия и всепроще́ния;
Ра́дуйся, науча́яй нас терпе́нию, кро́тости и послуша́нию;
Ра́дуйся, священному́чениче Ку́кше, просвети́телю страны́ на́шея.
Конда́к 7
Хотя́ лю́ди страны́ на́шея утверди́ти в правосла́вной ве́ре и привести́ к ве́чному спасе́нию, не убоя́лся еси́ страда́ний и сме́рти за Христа́ Бо́га на́шего, но взе́мши Крест Его́, я́ко зна́мя побе́дное, усе́рдно взыва́л еси́: Аллилу́иа.
И́кос 7
Но́вую благода́ть Христа́ Спаси́теля на́шего восприя́ша лю́дие страны́ вя́тичей, егда́ возвести́л еси́ им путь спасе́ния, те́мже и просла́виша тя, ди́внаго во святы́х Бо́жиих и возопи́ша ти такова́я:
Ра́дуйся, ре́вностный побо́рниче Правосла́вия, к ве́ре приводя́й неве́рныя;
Ра́дуйся, неустраши́мый во́ине Христа́ Бо́га, кресто́м побежда́яй враги́ спасе́ния на́шего;
Ра́дуйся, неизме́нный храни́телю благода́ти и и́стины, Святы́м Креще́нием просвети́вый страну́ на́шу;
Ра́дуйся, му́дрый наста́вниче в неве́дении и заблужде́нии стра́ждущих;
Ра́дуйся, нас лю́бящих и чту́щих тя спаса́яй твои́ми моли́твами;
Ра́дуйся, священному́чениче Ку́кше, просвети́телю страны́ на́шея.
Конда́к 8
Стра́нно и безу́мно показа́лося уче́ние твое́ лю́дем страны́ на́шея, егда́ пропове́дал еси́ им Христа́ Бо́га, пострада́вшего ра́ди спасе́ния люде́й на кресте́ и воскре́сшаго из ме́ртвых. Сло́во бо кре́сное погиба́ющим юро́дство, а спаса́емым нам си́ла Бо́жия есть, вопию́щим: Аллилу́иа.
И́кос 8
Вся страна́ на́ша освяти́ся по́двиги и страда́нии твои́ми, страстоте́рпче Христо́в. Кто бо исчи́слит лише́ния и боре́ния твоя́, я́же за Христа́ подъя́л еси́, егда́ воста́ша на тя жрецы́ бесо́встии и оклевета́ша тя, преда́вше му́кам за и́мя Христо́во. Мы же, припада́я к честно́му о́бразу твоему́, умиле́нно взыва́ем ти:
Ра́дуйся, вити́е богопросвеще́нный, твои́ми словесы́ посрами́вый язы́ческая уче́ния;
Ра́дуйся, ре́вностный пропове́дниче и́стины, и́дольскую лесть обличи́вый;
Ра́дуйся, тве́рдый храни́телю догма́тов и нам помога́яй противостоя́ти ерети́ческому суему́дрию;
Ра́дуйся, па́стырей Це́ркве подвиза́яй на пропове́дание Сло́ва Бо́жия;
Ра́дуйся, ве́рный путеводи́телю всех в Ца́рство Све́та невече́рняго;
Ра́дуйся, твое́ю кро́вию напои́вый ни́ву Христо́ву и возрасти́вый плоды́ доброде́тели;
Ра́дуйся, священному́чениче Ку́кше, просвети́телю страны́ на́шея.
Конда́к 9
Вся́кия напа́сти и ско́рби и́збави нас, уго́дниче Бо́жий, се бо грех ра́ди на́ших ско́рби и боле́зни обыдо́ша нас, несть ми́ра в косте́х на́ших и исчеза́ет дух наш, но простри́ нам ру́ку по́мощи и пода́ждь нам дух терпе́ния, кро́тости и всепроще́ния, да с любо́вию вопие́м Го́споду Спаси́телю на́шему: Аллилу́иа.
И́кос 9
Вити́я многовеще́нный показа́ся блаже́нный Пи́мен, егда́ посреде́ це́ркве Пече́рския возопи́ велегла́сно: брат наш Ку́кша в сей день проти́ву све́та убие́н есть, и сия́ ре́кши, чи́стую ду́шу свою́ Бо́гу предаде́, нас же научи́ пе́ти тебе́ си́це:
Ра́дуйся, звездо́ све́тлая, во тьме жи́зни нам светя́щая;
Ра́дуйся, заре́ светоза́рная, прогоня́ющая тьму искуше́ний и бед;
Ра́дуйся, на зар́е возсия́вый твои́ми страда́нии;
Ра́дуйся, Пи́мена блаже́нного подви́гнувый на прорече́ние;
Ра́дуйся, вку́пе с ним возше́дый во оби́тели О́тца Небе́снаго;
Ра́дуйся, помо́щниче наш в час сме́рти на́шея;
Ра́дуйся, священному́чениче Ку́кше, просвети́телю страны́ на́шея.
Конда́к 10
Спасти́ хотя́ от преле́сти бесо́вския страну́ на́шу, оста́вил еси́ святу́ю оби́тель Пече́рскую, возложи́в все упова́ние на Ма́терь Бо́жию, несокруши́мую сте́ну и прибе́жище ве́рных. По блаже́нней же кончи́не твое́й возврати́лся еси́ па́ки во святу́ю оби́тель, иде́же мо́щи твоя́ сия́ют чудесы́ мно́гими, подвиза́я ве́рных воспева́ти Еди́ному Бо́гу: Аллилу́иа.
И́кос 10
Сте́ну неруши́мую обре́л еси́, преподо́бне, Пречи́стую Ма́терь Бо́жию, име́я Ю засту́пницу и ди́вную путеводи́тельницу, проше́л еси́ всю страну́ на́шу с про́поведию Ева́нгелия и по сме́рти твое́й возврати́лся еси́ во оби́тель Пече́рскую, иде́же и погребе́н был еси́. Мы же, поклоня́ющиеся честны́м моще́м твои́м, прославля́ем тя си́це:
Ра́дуйся, ве́рный служи́телю Пресвяты́я Богородицы, по́мощию Ея́ укрепле́нный;
Ра́дуйся, преди́вное украше́ние оби́тели Пече́рския, те́лом и ду́хом в ней ве́чно пребыва́я;
Ра́дуйся, ра́досте мона́хов и утеше́ние в ми́ре скорбя́щих;
Ра́дуйся, заблу́дших и па́дших возвраща́яй в объя́тия Отча́;
Ра́дуйся, ю́ным подава́яй смысл к уче́нию сло́ва Бо́жия;
Ра́дуйся, и нас недосто́йных не оставля́яй твои́ми моли́твами;
Ра́дуйся, священному́чениче Ку́кше, просвети́телю страны́ на́шея.
Конда́к 11
Пе́ние усе́рдное прино́сим тебе́, вели́кий уго́дниче Христо́в, священному́чениче Ку́кше, про́сим и мо́лим тя; прими́ на́ша недосто́йныя моли́твы в похвалу́ тебе́ возноси́мыя и да́ждь нам си́лы, да после́дуем стопа́м твои́м во испове́дании Ве́ры правосла́вныя и научи́ нас кре́пко, да́же до сме́рти стоя́ти за сла́ву и́мени Божия и воспева́ти: Аллилу́иа.
И́кос 11
Светоприе́мная свеща́ и́стиннаго све́та яви́ся нам па́мять твоя́, преподо́бне Ку́кше, сего́ ра́ди прославля́ет тя страна́ наша, я́ко сро́дника на́шего по пло́ти и единоплеме́нника. Ты же прими́ от нас, недосто́йных, песнь сию́:
Ра́дуйся, гра́да на́шего честны́й покрови́телю и сро́дник твои́х по пло́ти просвети́телю;
Ра́дуйся,у́чителю наш и засту́пниче, в годи́ну ско́рби терпе́нию нас науча́яй;
Ра́дуйся, моли́твенниче за не́мощных и па́дших, Христа́ Бо́га умилостивля́яй;
Ра́дуйся, щите́ тве́рдый, и́мже мы защища́емся от нападе́ний вра́жиих;
Ра́дуйся, всех объе́мляй твое́ю любо́вию;
Ра́дуйся, твои́м честны́м о́бразом при́сно с на́ми пребыва́яй;
Ра́дуйся, священному́чениче Ку́кше, просвети́телю страны́ на́шея.
Конда́к 12
Благода́ти Боже́ственныя сосу́д был еси́, преподо́бне, из него́же напая́еши всех нас уче́нием, му́дростию и доброде́телию, да вси почита́ющии тя и́мут ра́дость ве́чную в Ца́рствии Христо́вом, и́деже ты со А́нгелы пое́ши: Алли́луиа.
И́кос 12
Пою́щее по́двиги твоя́ и страда́ния, хва́лим тя, преподо́бне о́тче Ку́кше и усе́рдно вопие́м ти; о, вели́кий наш уч́ителю и наста́вниче в ве́ре правосла́вной, прими́, я́ко убо́гий дар, песнь сию́, приноси́мую тебе́:
Ра́дуйся, апо́столе страны́ на́шея, просвети́вый нас ве́рою;
Ра́дуйся, до́брый наш па́стырю, защища́яй ста́до твое́ от волко́в лю́тых;
Ра́дуйся, святи́телей Бо́жиих бо́дрость и укрепле́ние;
Ра́дуйся, иере́ев похвало́ и ра́дование све́тлое;
Ра́дуйся, смире́нных и́ноков вразумле́ние и ти́хое весе́лие;
Ра́дуйся, путеводи́телю всех люде́й в Ца́рство И́стины и благ ве́чных;
Ра́дуйся, священному́чениче Ку́кше, просвети́телю страны́ н́ашея.
Конда́к 13
(Этот кондак читается тpижды, затем икос 1 и кондак 1)
О, пресла́вный уго́дниче Христо́в, священному́чениче Ку́кше, прими́ ма́лое сие́ моле́ние на́ше и твои́м святы́м предста́тельством изба́ви нас от вся́каго зла, и в годи́ну ско́рби даждь нам си́лу дерзнове́нно испове́дати святу́ю Правосла́вную ве́ру, и в час кончи́ны на́шея бу́ди нам помо́щник и уте́шитель, да пое́м просла́вльшему тя Бо́гу: Аллилу́иа.
И́кос 1
А́нгелов Творе́ц посла́ тя из оби́тели Пече́рския в страну́ на́шу, да просвети́ши лю́дие седя́щия во тьме и се́ни сме́ртней, и наста́виши заблу́дшия во тьме язы́чества. Ты же прише́л еси́ к нам, вели́кий уго́дниче, ве́рою Христо́вою, я́ко ка́мением многоце́нным, украша́я страну́ на́шу. Те́мже просвеще́ни ве́рою и в ней утвержде́ни, любо́вию вопие́м ти си́це:
Ра́дуйся, свети́ло пресве́тлое, луча́ми свои́ми осиява́ющее вели́кую Росси́ю;
Ра́дуйся, честны́й во́ине Христа́ Бо́га, мрак неве́рия усе́рдно прогоня́ющий;
Ра́дуйся, чудотво́рче преди́вный, твои́ми чудесы́ всех удиви́вый;
Ра́дуйся, столпе́ Це́ркве Христо́вой, на подкрепле́ние нам от Бо́га угото́ванный;
Ра́дуйся, я́ко тобо́ю научи́хомся поклоня́тися Творцу́ в Тро́ице;
Ра́дуйся, священному́чениче Ку́кше, просвети́телю страны́ на́шея.
Конда́к 1
Избра́нному от оби́тели Пече́рския, страны́ вя́тичей просвети́телю, похва́льное прино́сим пе́ние. Ты же, я́ко ве́лий учи́телю наш и засту́пниче, моли́ Христа́ Бо́га да изба́вит страну́ на́шу от бед и напа́стей, и утверди́т ны в Правосла́вии и ве́ре, да любо́вию вопие́м ти:
Ра́дуйся, священному́чениче Ку́кше, просвети́телю страны́ на́шея.
Моли́тва священному́ченику Ку́кше
Святы́й страстоте́рпче, священному́чениче Ку́кше, соверши́вый по́двиги апо́стольския посреде́ обита́ния соплеме́нник твои́х, на́ших пре́дков, и́хже ты просвеща́л еси́ све́том и́стиннаго богопозна́ния, и по да́нней ти благода́ти Ду́ха Свята́го бе́сы прогна́вый, дождь с небесе́ своди́вый, е́зеро изсуши́вый и сотвори́вый и́на мно́га чудеса́, запечатле́в многострада́льный свой по́двиг му́ченическою кончи́ною! Приими́ от нас усе́рдныя и умиле́нныя моли́твы и вознеси́ я́ ко Престо́лу Святы́я Тро́ицы, иде́же ты в лице́ святы́х предстои́ши, я́ко да твои́м хода́тайством Ми́лостивый Госпо́дь утверди́т в ми́ре, си́ле и сла́ве страну́ Росси́йскую, в ча́дех же Святы́я Правосла́вныя Це́ркве да укрепи́т дух ве́ры и благоче́стия, в па́стырех ея́ да усугу́бит ре́вность к назида́нию пасо́мых и да при́зрит ми́лостивным о́ком на лю́ди предстоя́щия и прибега́ющия ко твое́й по́мощи. Ей, святы́й уго́дниче Бо́жий! Ве́мы, я́ко ве́лиих ра́ди страда́ний твои́х мно́го мо́жет моли́тва твоя́ ко благосе́рдию Влады́ки. сего́ ра́ди, я́ко ча́да твоя́ по ве́ре, припа́дающе к ра́це честны́х и многоцеле́бных моще́й твои́х, дарова́нных по всеблаго́му промышле́нию Бо́жию и по благослове́нию первоиера́рха Ки́евския Це́ркве в на́ше освяще́ние и в зна́мение твоего́ о нас заступле́ния, моли́м тя в ду́се сокруше́ннем и смире́ннем: не пре́зри моле́ний на́ших, излива́емых пред тобо́ю, и вознеси́ я́ ко Всеще́дрому Бо́гу, я́ко кади́ло благово́нное, да твои́м хода́тайством вы́ну почи́ет благода́ть его́ на гра́де сем, в не́мже чти́тся пресла́вное и́мя твое́, и лю́ди, живу́щии в нем, да сохраня́тся от гла́да, огня́, смертоно́сныя я́звы и напра́сныя сме́рти, от вся́ких бед и напа́стей. Споспе́шствуй, священному́чениче Ку́кше, святы́ми твои́ми моли́твами честно́му бра́тству свята́го хра́ма сего́, да приумно́жится сие́ и процвета́ет во сла́ву Триеди́наго Бо́га, в похвалу́ твоего́ и́мене и во бла́го Святы́я Правосла́вныя Це́ркве, да та́ко вси, охраня́еми твои́м предста́тельством, ми́рно и благоче́стно поживу́т, сла́вяще и благодаря́ще Еди́наго И́стиннаго Бо́га, во Святе́й Тро́ице сла́вимаго, Отца́ и Сы́на и Свята́го Ду́ха. Ами́нь.
Величание:
Величаем тя/,преподо́бный священному́чениче Ку́кше,/ и чтим честна́я страда́ния твоя́,// я́же за Христа́ претерпе́л еси́.
